الدكتور عمرو حسن يكتب: هل فقدنا فرصة الولادة الطبيعية؟

بحسب نتائج المسح الصحي للأسرة المصرية (2021): بلغت نسبة الولادة القيصرية في مصر 72%، يعني من كل 10 أمهات، 7 بيولدوا بقيصرية!

وبلغت نسبة الولادة القيصرية في المنشآت الحكومية: 63% و في المستشفيات الخاصة 81%!

لكن السؤال الحقيقي:

هل كل العمليات دي كانت ضرورية فعلًا؟

ولا في آلاف الستات كان ممكن يولدوا طبيعي.. لو اتوفرت لهم المعلومة، والدعم، والقرار الصح؟

الولادة الطبيعية مش بس "شكل" من أشكال الولادة.. هي:-

- رحلة بيولوجية كاملة بيشارك فيها الجسم والهرمونات والعقل
- تجربة نفسية بتعزز ثقة الأم بجسمها
- ولادة طبيعية = وقاية طويلة المدى للطفل من مشاكل التنفس والمناعة 
لكن للأسف… ضغط الوقت، وسوء التثقيف، وخوف الأمهات ، بيخلّي "القيصرية" تبقى الطريق الأسرع، حتى لو مش الأفضل دائمًا.

أهم 9 نصائح تزيد فرصتك في الولادة الطبيعية:

1. اختاري طبيب مؤمن بالولادة الطبيعية
اختاري طبيب عنده:
دعم نفسي للأم، مش بس طبي

2. افهمي جسمك… واتثقفي بدري
ابدأي من بدري تعرفي عن:
- علامات الولادة الطبيعية
- تمارين التنفس
- خطورة اللجوء المبكر للطلق الصناعي أو القيصرية بدون داعٍ
كل ما كنتي مثقفة أكتر… كانت فرصتك في القرار الصح أعلى.

3.  مارسي الرياضة بانتظام
المشي، السباحة، اليوجا… كلهم بيساعدوا على:
- تقوية عضلات الحوض والرحم
- تسهيل الولادة

4.  حافظي على تغذية ذكية… مش بس "كويسة"
الجنين لازم يوصل لحجم صحي بدون ما يزيد عن الطبيعي،  التغذية المتوازنة بتساعد على:
- ولادة أسهل
- تجنب تحريض الولادة المبكر
- تقليل فرص القيصرية بسبب "وزن الجنين الكبير"
تجنبي:
السكريات الزائدة :  بتزود وزن الجنين
الأملاح الزائدة :  بتسبب تورم ومشاكل الضغط
وركزي على:
البروتين الحيواني والنباتي
الكالسيوم والحديد
الفواكه الغنية بمضادات الأكسدة

5.  متستعجليش الولادة!
كتير من الأمهات بيتجهوا للقيصرية بدافع التوقيت أو الترتيب:
"عاوزة أولد قبل العيد "
"الدكتور مسافر… يلا نولد قبلها بيومين!"
لكن الحقيقة؟
الولادة الطبيعية محتاجة صبر وثقة في توقيت جسمك.
الجسم بيولد لما يكون مستعد
متخليش التواريخ، السفر، أو الترتيب يسرقوا منك تجربة الولادة الطبيعية
الانتظار = فرص أعلى لطلق طبيعي + ولادة بدون تدخل

6. اختاري بيئة داعمة وقت الولادة
اختاري مستشفى بتشجع الولادة الطبيعية
وفّري لنفسك أجواء هادية، موسيقى مريحة، إضاءة خفيفة
بيئة الولادة بتأثر على الهرمونات، خصوصًا "الأوكسيتوسين" المسؤول عن الطلق.
وجود زوجك معاكي في لحظة الولادة بيفرق كتير:
- نفسياً: تقليل القلق والتوتر
- عملياً: دعم مستمر يخليكي تكملي الطريق الطبيعي للآخر

7.  متخافيش من "وجع الولادة" و اعرفي وسائل تخفيف الألم الطبيعية والطبية
أغلب الستات بتختار القيصرية خوفًا من الألم، لكن النهاردة في وسائل تخفيف ألم آمنة زي :
- الإيبيدورال
- الولادة في الماء
- التنفس الواعي 

8 . برمجي عقلك… الولادة الطبيعية مش "خطر"
الميديا خلت الولادة الطبيعية مرعبة… لكن الحقيقة؟
أغلب السيدات اللي جرّبوها مرة، بيطلبوها في الولادة الجاية بإرادتهم.

9. صدقي إن جسمك يقدر
جسمك مصمم إنه يولد… وملايين النساء حول العالم بيولدوا طبيعي كل يوم
الثقة = نص الطريق

الخلاصة:
الولادة الطبيعية مش بس ممكنة… لكنها حقك، لو جسمك يسمح، والمعلومات عندك كاملة.
الولادة الطبيعية مش بس "أصل الخِلقة"
هي حق شخصي، وتجربة إنسانية، وخيار صحي… لو اتوفرت له الظروف الصح.

-القيصرية؟ نعمة وقت الضرورة
-الطبيعي؟ هو البداية الأفضل… لو خدتِ فرصتك للآخر

د عمرو حسن 
أستاذ النساء والتوليد قصر العيني